Një aksion ndërkombëtar policor, i zhvilluar më 15 prill në Mal të Zi dhe Gjermani, ka çuar në arrestimin e 12 personave, sekuestrimin e 4,2 tonëve drogë dhe goditjen e një rrjeti me veprimtari në pesë kontinente.
Ndër të arrestuarit në Mal të Zi është Svetisllav Fillipoviç, 47-vjeçar nga Podgorica, i identifikuar si një nga drejtuesit e kartelit ballkanik. Ai dyshohet për prodhim, posedim dhe shpërndarje të paligjshme të narkotikëve, si dhe për tregti të paligjshme të armëve dhe materialeve shpërthyese, me dënim të mundshëm deri në 15 vjet burg. Europol e ka cilësuar si person me rrezikshmëri të lartë.
Që nga viti 2002, Fillipoviç figuron si drejtor i kompanisë Spectacular, e cila ka pranuar 139 dërgesa nga 16 vende, përfshirë Ekuadorin, Ukrainën, Kolumbinë dhe një kompani nga Hong Kongu. Kjo kompani importon banane, shalqinj, fruta të thata dhe arra. Në vitin 2023, ajo gjeneroi të ardhura prej 664.206 eurosh. Fillipoviç është po ashtu bashkëpronar i kompanisë Europayment. Llogaritë e të dyja kompanive janë bllokuar.
Katër persona u arrestuan edhe në Gjermani, ku, sipas Interpol-it, veprojnë grupe globale të krimit të organizuar, të përfshira në trafik droge, krime kundër pronës dhe kontrabandë njerëzore. Të arrestuarit dyshohen për rrënjosje të fortë në rrugët e trafikimit të kokainës.