Prokuroria e Posaçme Kundër Korrupsionit dhe Krimit të Organizuar (SPAK) njoftoi arrestimin e shtetasit Emiljan Burba, i cili akuzohet si një prej drejtuesve të një grupi të strukturuar kriminal të përfshirë në trafikun ndërkombëtar të lëndëve narkotike. Procedimi penal nr. 9 është regjistruar më 18 janar 2024 për veprat penale të "Trafikimit të lëndëve narkotike", "Grupit të strukturuar kriminal" dhe "Kryerjes së veprave penale nga organizata kriminale".
Sipas hetimeve, grupi kriminal dyshohet se ka organizuar trafikimin e lëndëve narkotike nga Shqipëria drejt Malit të Zi me destinacion Gjermaninë, nga Shqipëria drejt Turqisë, si dhe nga vendet e Amerikës së Jugut drejt shteteve të Bashkimit Europian. Provat janë siguruar përmes analizës së komunikimeve në platformën e enkriptuar Sky ECC, në bashkëpunim me autoritetet franceze.
Janë dokumentuar tri episode të trafikut ndërkombëtar të lëndëve narkotike:
• 3 nëntor 2020: Sekuestrimi i 1,722 kg marijuanë në Malin e Zi.
• 23 nëntor 2020: Sekuestrimi i 475 kg kokainë në Portin e Vlissingen, Holandë (ngarkesë e ardhur nga Ekuadori).
• 26 janar 2021: Sekuestrimi i 236 kg marijuanë në Turqi.
Në kuadër të këtij procedimi, deri më tani janë identifikuar 14 persona të tjerë nën hetim. Masa e sigurisë ndaj Emiljan Burbës është ekzekutuar nga Policia e Shtetit. Hetimet për identifikimin e personave të tjerë të përfshirë në këtë veprimtari mbeten në vijim.
Përditësime
Gjykata e Posaçme ka caktuar masën e sigurisë "arrest në burg" për Emiljan Burbën, i akuzuar nga SPAK për trafik ndërkombëtar droge. Prokuror i çështjes është Adnan Xholi.