Ministri për Punë, Familje dhe Vlerat e Luftës Çlirimtare, Andin Hoti, ka njoftuar të premten në seancën e Kuvendit të Kosovës se Ligji për vlerat e luftës çlirimtare të Kosovës do të procedohet javën e ardhshme në mbledhjen e Qeverisë për miratim. Ai ka shpjeguar se në ministri po hartohet koncept-dokumenti, i cili është pranë finalizimit, dhe pas miratimit qeveritar do të fillojnë procedurat e tjera deri në Kuvend.
Organizata e Veteranëve të Luftës së UÇK-së (OVL-UÇK) ka reaguar duke e vlerësuar këtë zhvillim si rezultat të angazhimit të tyre të muajve të fundit. Kjo organizatë ka dërguar shkresa zyrtare te Qeveria, Kuvendi dhe grupet parlamentare, ka aktivizuar strukturat në degë, ka lëshuar deklarata publike dhe ka mbajtur prani të vazhdueshme në media.
OVL-UÇK e ka cilësuar hapin si të rëndësishëm, por jo të mjaftueshëm. Ajo kërkon që procesi të ofrojë përmbajtje, jo vetëm simbolikë, dhe që teksti përfundimtar të pasqyrojë plotësisht kërkesat e tyre të deklaruara, të mbrojë vlerat e Luftës Çlirimtare dhe të garantojë njohje dinjitetshme për çdo kategori pjesëmarrëse.
Organizata ka paralajmëruar se çdo përpjekje për të zbehur këto parime do të jetë e papranueshme dhe e padenjë për sakrificën që solli lirinë dhe shtetësinë e Kosovës. Ajo do ta ndjekë procesin me vigjilencë të plotë deri në miratimin përfundimtar në Kuvend, duke theksuar se vlerat e UÇK-së janë detyrim institucional i përhershëm dhe borxh ndaj luftëtarëve, i cili nuk vjetërohet.