Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar në lidhje me vendimin e qeverisë për zbatimin e Ligjit për të Huajt dhe ligjit për automjete. Reagimi vjen pas dakordimit që ky zbatim të nisë me lehtësira për serbët që punojnë në institucione paralele ose studiojnë në universitetin në veri të Kosovës.
Në një komunikatë për media, OVL-UÇK e cilësoi këtë si hipokrizi politike të Albin Kurtit, duke thënë se ai ka ndërtuar karrierën mbi retorikë patriotike, ndërsa po negociaton hapësira të reja për strukturat ilegale të Serbisë brenda Kosovës. Ata theksojnë se Kurti deklaron se strukturat paralele serbe janë shuar, por në realitet po krijohen mekanizma që u japin atyre rol në zbatimin e ligjeve të Republikës së Kosovës.
OVL-UÇK e quajti vendimin skandal të rëndë politik dhe moral, duke e konsideruar si mashtrim ndaj qytetarëve dhe shtetit. Sipas tyre, qeveria e Kurtit rikonfirmon se retorika për sovranitet dhe mbrojtje të shtetit ka qenë propagandë për konsum politik. Kjo qeveri ka izoluar Kosovën nga aleatët kryesorë dhe po bën kompromise për të cilat më parë i ka akuzuar të tjerët si tradhti kombëtare.
Veteranët thonë se nuk do të heshtin përballë politikave që relativizojnë sakrificën e luftës. Ata theksojnë se Kosova është ndërtuar mbi gjakun e dëshmorëve të UÇK-së dhe jo mbi pazare politike në prapaskenë. Çdo përpjekje për ta cenuar këtë sakrificë do të përballet me reagimin e veteranëve dhe atyre që e shohin shtetin si amanet të luftës çlirimtare.
Përditësime
Autoritetet kosovare njoftojnë se ligji për të huajt dhe ligji për automjetet zbatohen plotësisht që nga e diela.
- Lëshohen leje të përkohshme qëndrimi për serbët pa dokumente kosovare.
- Njihen dokumentet e identifikimit të tyre.