Linja e drejtpërdrejtë ajrore mes Shkupit dhe Tivatit do të nisë më 1 maj dhe fillimisht do të operojë dy herë në javë, njoftoi më 30 tetor zëvendëskryeministri dhe ministri i Transportit i Maqedonisë së Veriut, Aleksandar Nikolloski. Lajmi u bë i ditur pas takimit të tij me zëvendëskryeministrin e Malit të Zi, Filip Ivanoviq. Sipas Nikolloskit, linja pritet të rrisë numrin e udhëtarëve, shkëmbimet turistike dhe bashkëpunimin ekonomik mes dy vendeve.
Nikolloski tha se linja po realizon atë që ishte diskutuar rreth 20 ditë më parë, gjatë vizitës së tij në Mal të Zi. Ai shprehu shpresën se do të shtohet numri i udhëtarëve dhe se lidhja do të ndihmojë zhvillimin e turizmit dhe të biznesit. Ivanoviq tha se lidhshmëria mes shteteve nuk duhet të matet vetëm përmes marrëdhënieve politike, por edhe përmes qasjes në ekonomitë e tyre dhe mundësive për bashkëpunim mes qytetarëve e kompanive. Sipas tij, linja do të lehtësojë udhëtimet, do të nxisë turizmin dhe do të krijojë mundësi më të mira për bashkëpunim institucional.
I pyetur për mundësinë e lidhjes së Aeroportit të Ohrit me Malin e Zi, Nikolloski tha se po zhvillohen negociata me kompaninë ajrore Air Montenegro për dy linja të tjera të mundshme: Tivat–Ohër dhe Shkup–Podgoricë. Ivanoviq tha se linja e re është vetëm fillimi dhe se diskutimet për lidhje të tjera do të varen nga mënyra se si do të funksionojë ajo dhe nga rezultatet.
Bashkëpunimi ekonomik dhe integrimi evropian
Dy zëvendëskryeministrat ranë dakord që vitin e ardhshëm të organizojnë një forum biznesi, ku do të marrin pjesë kompani nga të dyja vendet. Sipas Nikolloskit, në takim u diskutua edhe për ndërlidhjen infrastrukturore, përfshirë autostradën Shkup–Bllacë dhe lidhjet me portet e Selanikut, Durrësit dhe Tivarit. Ai tha se Maqedonia e Veriut synon të sigurojë dalje në të paktën tri porte.
Nikolloski tha se dy vendet nuk kanë çështje të hapura dhe se bashkëpunimi politik do të thellohet. Ai përgëzoi Malin e Zi për reformat dhe përparimin drejt Bashkimit Evropian, duke shprehur shpresën që vendi të anëtarësohet në vitin 2028. Ivanoviq tha se Mali i Zi pret të përfundojë negociatat e anëtarësimit deri në fund të vitit dhe të bëhet anëtar i plotë i BE-së në vitin 2028. Ai shtoi se BE-ja nuk mund të jetë e plotë pa të gjitha vendet e rajonit dhe se Mali i Zi do të mbështesë Maqedoninë e Veriut në procesin e integrimit evropian.