Ministri për Evropën dhe Punët e Jashtme, Ferit Hoxha, zhvilloi një takim më 21 prill me drejtorin ekzekutiv të kompanisë ajrore Luxair, Gilles Feith, dhe ekipin e tij. Në fokus ishte shqyrtimi i mundësive për vendosjen e linjave ajrore direkte midis Shqipërisë dhe Luksemburgut.
Hoxha theksoi se diplomacia ekonomike është një prioritet kryesor i politikës së jashtme shqiptare dhe nuk është slogan. Ai nënvizoi potencialin e madh për linja të reja ajrore, duke u mbështetur në rritjen e shpejtë të sektorit turistik dhe zgjerimin e infrastrukturës ajrore në Shqipëri.
Sipas ministrit, rritja e lidhshmërisë ajrore shkon përtej transportit. Ajo mbështet tregtinë, tërheq investime, lehtëson lëvizshmërinë dhe afron njerëzit, në përputhje me prioritetet e zhvillimit të Shqipërisë, perspektivën e rritjes ekonomike dhe rrugën drejt anëtarësimit në Bashkimin Europian.
Hoxha shprehu interesin për vijimin e dialogut me Luxair dhe mirëpriti praninë e saj në tregun shqiptar si hap konkret drejt thellimit të bashkëpunimit ekonomik mes dy vendeve. Takimi u reflektua në postime në rrjetet sociale nga ministri.