Anëtari i ekipit mbrojtës të ish-presidentit Hashim Thaçi, Lirim Greiçevci, ka reaguar pas intervistës së ish-prokurorit Clint Williamson për BIRN. Në një postim në rrjetet sociale, Greiçevci e ka cilësuar Williamsonin si "prokuror mashtrues" dhe "më i dëmshëm se Dick Marty".
Greiçevci pretendon se, pas hetimeve që zgjatën rreth tri vjet, ish-prokurori deklaroi në Bruksel se kishte vërtetuar "përgjithësisht" akuzat e raportit të Martyt, përfshirë trafikimin e kufizuar të organeve. Sipas mbrojtjes së Thaçit, dokumentacioni i lënë nga Williamson nuk mbështet këto pretendime. Greiçevci ka theksuar se aktakuza e përgatitur nga Williamson nuk u dorëzua dhe as nuk u konfirmua kurrë.
Tutje, Greiçevci ka pretenduar se ish-prokurori David Schwendiman kishte refuzuar të vepronte mbi bazën e deklarimeve të Williamsonit, veprim të cilin Greiçevci e ndërlidh me shkarkimin e mëvonshëm të Schwendimanit. Për prokurorin Jack Smith, ai deklaroi se hartoi një aktakuzë të ndryshme nga ajo e paraardhësit të tij. Në fund, Greiçevci kërkoi përgjegjësi nga Williamson, duke shtuar se deklaratat e tij shërbyen si grep për të imponuar një strukturë gjyqësore jashtë vendit nën kërcënimin e OKB-së.