Gjatë procesit të zgjedhjeve të parakohshme parlamentare që po zhvillohen këtë të diel, Lista Serbe ka përsëritur praktikën e votimit në grup. Sipas raportimeve nga terreni, anëtarë dhe përkrahës të këtij subjekti politik janë mbledhur fillimisht para selisë së partisë në Mitrovicë, për t'u drejtuar më pas në mënyrë të organizuar drejt qendrave të votimit, kryesisht në komunat me shumicë serbe në veri të vendit.
Kryetari i Listës Serbe, Zlatan Elek, ka ushtruar të drejtën e votës në orët e para të mëngjesit së bashku me një grup qytetarësh. Kjo formë e votimit është evidentuar edhe në proceset e mëparshme zgjedhore. Vëzhguesit dhe kritikët theksojnë se votimi në mënyrë të organizuar është në kundërshtim me dispozitat e Ligjit për Zgjedhje.
Ndërkohë, autoritetet kanë njoftuar se procesi zgjedhor ka nisur pa probleme dhe të gjitha qendrat e votimit janë hapur në kohën e parashikuar.