Lagjja e njohur si Little Albania, e vendosur në Bronx në afërsi të Arthur Avenue, është zyrtarizuar në hartën e re të enklavave etnike të New Yorkut. Kjo hartë synon të pasqyrojë rolin e 30 komuniteteve të ndryshme në identitetin kulturor të metropolit amerikan, duke përfshirë zona si Koreatown, Chinatown, Little Ukraine, Little Guyana, Little Pakistan dhe Little Yemen.
Publikimi i këtij dokumenti nga bashkia e qytetit ka sjellë reagime të shumta, pasi në listë mungon Little Italy, lagjja historike e emigrantëve italianë. Politikanë lokalë dhe drejtues të institucioneve kulturore e kanë kundërshtuar këtë vendim, duke argumentuar se kontributi i komunitetit italian është thelbësor për historinë e New Yorkut dhe nuk duhet të anashkalohet.
Bashkia e qytetit ka sqaruar se qëllimi i hartës është dokumentimi i zonave që janë formuar ndër vite nga grupe të ndryshme emigrantësh. Pavarësisht polemikave, Little Albania mbetet e regjistruar në hartën zyrtare, ndërsa debati ka nxitur diskutime më të gjera mbi kriteret e përzgjedhjes së këtyre zonave dhe përfaqësimin e barabartë të trashëgimisë kulturore në qytet.