Nexhat Llumnica, kryetar i Sindikatës së Re të KEK-ut, ka ngritur shqetësime serioze për menaxhimin e sektorit energjetik në Kosovë. Ai thekson se vendi po neglizhon një nga resurset e tij kryesore natyrore – thëngjillin, të cilin e ka të mjaftueshëm dhe të gatshëm për shfrytëzim.
Sipas Llumnicës, pavarësisht këtij potenciali, Kosova vazhdon të importojë energji elektrike përmes kompanive të tjera, duke shkaktuar kosto të larta për qytetarët dhe shtetin. Ndërkohë, shumë shtete të rajonit detyrohen ta blejnë thëngjillin nga vende të tjera.
“Ne si punëtorë prodhojmë energji në kushte të rënda, në baltë, në mihje dhe në termocentrale, por pagat tona nuk janë të dinjitetshme. Punëtorët e KEK-ut vuajnë, ndërsa KEDS dhe KESCO kanë miliona”, tha ai në emisionin Gazeta.
Llumnica akuzon KEDS dhe KESCO se nuk i respektojnë të drejtat e punëtorëve dhe nuk i paguajnë ata siç duhet, duke u pasuruar në kurriz të qytetarëve të Kosovës, punëtorëve dhe vetë shtetit.
Ai thekson se zhvillimi i vendit duhet të bazohet në prodhimin vendor, çka do të sillte energji më të lirë për qytetarët dhe trajtim më dinjitoz për punëtorët. “Një shtet që shfrytëzon resurset e veta është shtet më i përparuar, me ekonomi më të fortë dhe me qytetarë e punëtorë më të mbrojtur”, ka përfunduar ai.