Në një ndeshje të Ligës së Dytë rumune midis ekipeve Bihor Oradea dhe Voluntari, ndodhi një incident i pazakontë.
Futbollisti i Bihor Oradea-së, Razvan Ginje, kryen një ndërhyrje të ashpër ndaj kundërshtarit të tij nga Voluntari, Alexandru Git. Ky i fundit mbeti i shtrirë në fushë me dhimbje të forta. Sipas raportimeve, Git dyshohet se ka pësuar frakturë në tibie dhe fibulë, dëmtim që mund ta mbajë jashtë fushave për një kohë të gjatë.
Situata u komplifikua kur ambulanca hyri në fushë për të transportuar të dëmtuarin, por ngeci për shkak të terrenit të rënduar nga reshjet e shiut dhe përmbytjes. Në mungesë të mjeteve të tjera, futbollistët dhe stafet e të dyja ekipeve ndërhynë duke e shtyrë fizikisht ambulancën për ta nxjerrë nga fusha.
Ky proces zgjati disa minuta. Më pas, mjeti i emergjencës u largua dhe Alexandru Git u dërgua në spital për trajtim të specializuar. Ndeshja vazhdoi pas kësaj ndërprerjeje.