Ish-shefi i kabinetit të kryeministrit, Luan Dalipi, është shpallur kandidati më i suksesshëm në procedurat e rekrutimit për pozitën e drejtorit ekzekutiv të Agjencisë për Investime dhe Eksport, institucion që funksionon në kuadër të Zyrës së Kryeministrit. Sipas rezultateve zyrtare të publikuara nga Ministria e Digjitalizimit dhe Administratës Publike, Dalipi ka grumbulluar gjithsej 80.6 pikë, nga të cilat 24 pikë janë arritur në testin me shkrim dhe 56.6 pikë në fazën e intervistimit.
Në renditjen përfundimtare, pas Dalipit u pozicionua Alban Maliqi me 73.8 pikë (29 pikë nga testi me shkrim dhe 44.8 pikë nga intervista). Procedurat e rekrutimit janë zhvilluar gjatë muajit qershor, ndërsa kandidatët e interesuar kanë afat prej 30 ditësh për të paraqitur ankesa në Këshillin e Pavarur Mbikëqyrës për Shërbimin Civil të Kosovës.
Luan Dalipi kishte njoftuar largimin nga pozita e Shefit të Stafit të Kryeministrit më 26 shkurt 2026, pas një shërbimi rreth pesë vjet e gjysmë në këtë detyrë. Në lidhje me këtë emërim, janë ngritur pikëpyetje mbi zbatimin e Ligjit Nr. 06/L-011 për Parandalimin e Konfliktit të Interesit në Ushtrimin e Funksionit Publik, i cili përcakton kufizime për punësimin e zyrtarëve të lartë në pozita drejtuese pas përfundimit të mandatit.