Fatos Lubonja, analist, foli në emisionin e News24-së për skandalet e fundit të qeverisë së kryeministrit Edi Rama dhe raportin e opozitës mbi çështjen e Belindës Balluku, zëvendëskryeministres dhe ministres së Infrastrukturës dhe Energjisë, e cila u shkarkua nga posti.
Lubonja tha se në një shtet ligjor dhe demokratik një skandal i këtyre përmasave do të kishte rrëzuar qeverinë dhe kreun e Partisë Socialiste. "Në një shtet ligjor këto nuk duhej të ndodhnin. Një skandal i përmasave të tilla do të kishte rrëzuar qeverinë, madje edhe kreun e PS-së. Sepse në një shtet demokratik opinioni publik ka shumë rëndësi dhe për të shmangur rënien në sondazhe do të ishin marrë masa", u shpreh ai.
Ai e përshkroi situatën në Shqipëri si deformim të funksionimit demokratik dhe e quajti vendin shtet banditësh që ka marrë pushtetin me forma banditeske. Lubonja ngriti pyetje mbi fuqinë e opozitës për ta rrëzuar pushtetin dhe mbështetjen e saj. Sipas tij, opozita po bën fasadën e demokracisë me ndjekjet penale, ndërsa shtroi dilemën nëse institucionet duhet të respektohen kur nuk funksionojnë siç duhet.
Imuniteti parlamentar
Lidhur me imunitetin parlamentar të Balluku-s dhe rolin e Gjykatës Kushtetuese, Lubonja theksoi se në vendet demokratike imuniteti mbron pavarësinë e deputetit dhe fjalën e lirë. Për pushtetarët, ai shndërrohet në arrogancë për paprekshmëri.
Ndryshimet në Kodin e Procedurës Penale
Lubonja u ndal te ndryshimet në Kodin e Procedurës Penale, duke i cilësuar si elementë që analizohen në kontekstin e regjimeve autokratike. "Bëhet sikur ndërtohet drejtësi e pavarur, por në realitet ndërtohet një regjim autokratik. Kjo është loja e Ramës", deklaroi ai.
Shkarkimi i Ballukut dhe ndryshimet në qeveri
Sa i përket shkarkimit të Balluku-s dhe ndryshimeve në qeveri, Lubonja tha se ato janë dopio lojë e Ramës për konsum të jashtëm. Kreu i qeverisë ka futur në kabinet njerëz të saj, veprim për legjitimim nga ndërkombëtarët në kontekstin e zhvillimeve kundër shtetit të së drejtës dhe pakësimit të korrupsionit.