Luçiano Boçi, nënkryetar i Partisë Demokratike, foli në emisionin “Terminal” të drejtuar nga Aurora Sulçe në A2 Televizion, për protestën e paralajmëruar nga opozita më 10 shkurt. Ai theksoi se kjo nuk është manovër politike, por reagim qytetar ndaj asaj që opozita e konsideron kapje të shtetit dhe korrupsion të përhapur.
Boçi u shpreh se protesta buron nga zemërimi dhe revolta e qytetarëve, të cilët ndihen të tradhtuar nga qeverisja aktuale. “Nuk ka skenarë të fshehtë. Është qytetari që gjen formën dhe mënyrën për të shprehur revoltën. Ne si deputetë kemi detyrimin të jemi në rreshtin e parë të kësaj revolte”, tha ai.
Sipas Boçit, protesta synon të mbrojë të vërtetën dhe interesin publik, duke i dhënë zë pakënaqësisë së qytetarëve ndaj korrupsionit dhe mungesës së drejtësisë. “Ne dalim për qytetarët, për të vërtetën dhe për besimin tek alternativa. Kjo nuk është shfrytëzim politik i situatës, por një reagim i domosdoshëm ndaj padrejtësisë”, theksoi ai.
Ai shtoi se më 10 shkurt pritet një mobilizim i gjerë qytetar, ku protesta do të shërbejë si mesazh i fortë kundër qeverisë dhe në mbrojtje të demokracisë.