Ministri i Financave, Petrit Malaj, zhvilloi një takim në 7 prill 2026 në Shëngjin, Lezhë, me përfaqësues të subjekteve që veprojnë në sektorin e ndërtimit. Ai ishte i shoqëruar nga drejtori i Përgjithshëm i Tatimeve, Ilir Binaj.
Gjatë takimit u trajtuan çështje në lidhje me zhvillimin e sektorit të ndërtimit në këtë rajon, si dhe ecurinë e zbatimit të planit operacional nga Administrata Tatimore. Ky plan ka si fokus formalizimin e sektorit, rritjen e deklarimit të pagave reale dhe përmbushjen e detyrimeve ligjore.
Malaj theksoi se ndërtimi është një nga sektorët më të rëndësishëm ekonomikë të vendit, së bashku me aktivitetet e ndërlidhura. Sipas tij, ky sektor duhet të mbështetet mbi bazë të fortë formalizmi dhe përmbushjeje të detyrimeve tatimore.
Ministri vlerësoi deklarimin e pagave reale si element kyç për zhvillimin e qëndrueshëm ekonomik, rritjen e të ardhurave në buxhet dhe garantimin e pensioneve si dhe të sigurisë sociale për punonjësit.
Sipas të dhënave, në rajonin e Lezhës ka pasur reflektim pozitiv në fashën 100.001–120.000 lekë, me rritje 134%, çka tregon se pagat reale janë më të larta se sa deklaroheshin më parë. Në rang vendi, është ulur nëndeklarimi i pagave minimale dhe ka zhvendosje të punonjësve drejt fashave më të larta, veçanërisht 70.001–100.000 lekë.
Ky proces ka sjellë rritje të të ardhurave nga kontributet dhe tatimi mbi të ardhurat nga punësimi, për shkak të korrektësisë së deklarimeve dhe jo rritjes së taksave.
Malaj sqaroi se synimi i qeverisë nuk është rritja e barrës fiskale për biznesin, por mbështetja dhe lehtësimi i tij. Barra ekzistuese duhet të shpërndahet në mënyrë të drejtë, që bizneset korrekte të mos penalizohen nga ato që nuk respektojnë rregullat.