Ministri i Financave Petrit Malaj bëri të ditur në konferencë për shtyp në 26 janar 2026 se pas fushatës së ndërgjegjësimit të Administratës Tatimore, pagat e 118 mijë punonjësve në sektorin e ndërtimit u rritën me 9% në dhjetor 2025, krahasuar me shtatorin e të njëjtit vit, duke arritur 78 milionë euro.
Së bashku me Drejtorin e Përgjithshëm të Tatimeve Ilir Binaj, Malaj evidentoi 8.784 subjekte aktive, kryesisht në Tiranë dhe Durrës. Në nëntor 2025 u dërguan 13.418 mesazhe të personalizuara për këto subjekte, me qëllim përmbushjen vullnetare të detyrimeve tatimore.
Shifrat e deklaruara tregojnë se 25% e punonjësve deklarohen me paga 40-50 mijë lekë (rreth 400-500 euro), 22% me 50-70 mijë lekë, ndërsa vetëm 7% mbi 120 mijë lekë. Malaj theksoi se këto nivele nuk përputhen me realitetin e tregut, ku sektori i ndërtimit përballet me mungesë krahune pune dhe ofron paga më të larta.
Pas fushatës, numri i punonjësve në fashën 400-500 euro u ul me 7%, u rrit me 18% numri në fashën 700-1000 euro, si dhe me mbi 10% pagat mbi 120 mijë lekë. Megjithatë, subjektet që nuk kanë reflektuar janë identifikuar dhe do të jenë objekt i kontrolleve të thelluara nga tatimet.