Administrata Tatimore publikoi të enjten listën e pagave indikative për sektorin mjekësor dhe estetikë, në vazhdën e kontrolleve të nisura nga drejtori i përgjithshëm Ilir Binaj. Kjo listë shërben si standard referues për analizën e riskut dhe identifikimin e mosdeklarimit të pagave reale.
Tatimpaguesit që deklarojnë paga nën këto nivele ose ndryshojnë kategorinë e profesionit për të ulur pagën do të konsiderohen me risk dhe do të verifikohen nga strukturat e specializuara. Qëllimi është rritja e deklarimeve të saktë të pagave dhe kontributeve të sigurimeve shoqërore për pensione më dinjitoze.
Në sektorin e kujdesit personal, pagat indikative fillojnë nga 75 mijë lekë për berberët dhe parukierët, 80 mijë lekë për estetistët, kozmetistët, make-up artistët dhe instruktorët e aerobikut apo kërcimit, deri në 120 mijë lekë për instruktorët personalë në palestra.
Në mjekësi, nivelet variojnë nga 80 mijë lekë për profilet mbështetëse deri në 215 mijë lekë për kirurgjitë e avancuara dhe anesteziologjinë. Mjeku i përgjithshëm llogaritet me 163 mijë lekë, ndërsa specialitetet si kardiologjia, neurologjia dhe gastroenterologjia rreth 200 mijë lekë.
Më 30 mars, Ilir Binaj njoftoi nisjen e kontrolleve që përfshijnë rreth 10 mijë tatimpagues dhe afro 45 mijë të punësuar në këto sektorë me informalitet të lartë.