Administrata Tatimore njofton se, duke filluar nga 15 janari 2026, do të zhvillojë kontrolle në terren për verifikimin e pagave të deklaruara në sektorin e ndërtimit. Këto masat zbatohen në kuadër të Planit Sektorial për Ndërtimin, që synon rritjen e kontributeve të sigurimeve shoqërore përmes deklarimit të pagave reale sipas profesioneve.
Kontrollet do të përqendrohen kryesisht te subjektet e vlerësuara me risk për nëndeklarim të pagave. Këto subjekte janë njoftuar më parë përmes sistemit elektronik e-Filing, por nuk kanë pasqyruar ndryshime në listë-pagesa. Fokus i veçantë do të jetë krahasimi i pagave të deklaruara me listën e pagave indikative sipas profesioneve, të publikuar në faqen zyrtare të Administratës Tatimore dhe të dërguar në llogaritë elektronike të tatimpaguesve rreth 30 ditë më parë, në dhjetor 2025.
Pagat nën nivelin indikativ konsiderohen risk. Për shembull, deklarimi i pagave nën 80 mijë lekë për punonjësit bazë ose nën 160 mijë lekë për vinçierët ngre dyshime për shmangie të detyrimeve. Me përjashtim të sanitarëve (60 mijë lekë), të gjithë të punësuarit e tjerë në ndërtim dhe veprimtaritë ndihmëse nuk duhet të kenë paga nën 80 mijë lekë. Kjo ka rritur pagën mesatare nga 68 mijë lekë në 85 mijë lekë, në një sektor me rreth 63 mijë punonjës.
Administrata Tatimore disponon të dhëna nga burime të ndryshme, si deklaratat tatimore, listë-pagesat, faturat fiskalizuara, organet vendore dhe aktorë publikë e privatë. Tatimpaguesit që ndryshojnë profesionin e punonjësve për të shmangur deklarimin real rrezikojnë kontrolle nga strukturat e specializuara.
Autoriteti u bën thirrje tatimpaguesve të deklarojnë saktë pagat dhe punonjësit, për të shmangur masat administrative dhe ligjore. Një mesazh elektronik u dërgua më 15 dhjetor 2025 tatimpaguesve me risk, duke theksuar zbatimin e planit për ndërgjegjësimin dhe deklarimin real të detyrimeve tatimore.