Presidenti i Shteteve të Bashkuara, Donald Trump, ka rikthyer vëmendjen te një objekt fortifikuar nëntokësor në Iran, i njohur si Mali i Kazmës ose Kuh-e Kolang Gaz La. Kompleksi ndodhet rreth 220 kilometra në jug të Teheranit dhe rreth 2 kilometra larg objektit bërthamor të Natanzit. Sipas vlerësimeve, objekti është ndërtuar në një thellësi prej 100 metrash nën shtresat e granitit.
Ndërtimi i këtij objekti nisi në vitin 2020, pas një akti sabotimi në impiantin bërthamor të Natanzit. Irani e ka deklaruar këtë vendndodhje pranë Agjencisë Ndërkombëtare për Energjinë Atomike (IAEA) si një objekt të ardhshëm për montimin e centrifugave të avancuara, të cilat shërbejnë për pasurimin e uraniumit dhe prodhimin e karburantit bërthamor. Drejtori i IAEA-s, Rafael Grossi, e ka cilësuar zhvendosjen e objekteve nën tokë si një përpjekje të shtetit iranian për të mbrojtur infrastrukturën e ndjeshme.
Ndërsa burimet e inteligjencës izraelite raportojnë se Teherani mund të ketë zhvendosur rezerva të uraniumit në këtë lokacion, presidenti Trump ka theksuar se nuk ka prova të regjistruara që mbështesin këto pretendime. Analistët e Institutit për Shkencë dhe Siguri Ndërkombëtare (ISIS) vlerësojnë se një sulm ndaj këtij objekti do të ishte tejet kompleks për shkak të fortifikimit të lartë, megjithëse sugjerojnë se sistemet ndihmëse si ventilimi dhe furnizimi me energji elektrike mund të jenë pika të cenueshme.