Shtetet e Bashkuara dhe Izraeli vazhdojnë sulmet masive në Iran, ndërsa lufta ka hyrë në javën e pestë. Sipas Wall Street Journal, që citon zyrtarë amerikanë, Presidenti Donald Trump po vlerëson se sa e rrezikshme do të ishte një operacion për nxjerrjen e uraniumit me trupat tokësore. Ai ende nuk ka marrë vendim, por është i hapur ndaj idesë për të parandaluar prodhimin e armëve bërthamore nga Irani.
Para sulmeve ajrore të nisura qershorin e kaluar, ku u bombarduan tre objekte bërthamore, Irani zotëronte mbi 400 kilogramë uranium me pastërti 60%, sipas Agjencisë Ndërkombëtare të Energjisë Atomike (IAEA). Për armë bërthamore kërkohet pastërti mbi 90%. Drejtor i Përgjithshëm i IAEA-së, Rafael Grossi, vlerëson se uraniumi ndodhet kryesisht në tunele nëntokësore dhe depozita në Isfahan dhe Natanz.
Planet për ofensivë tokësore
Washington Post raporton se planet janë në fazë të avancuar dhe përfshijnë operacione nga forcat speciale dhe trupat konvencionale në ishullin Kharg, thelbësor për 90% të eksporteve të naftës iraniane, si dhe në zona bregdetare pranë Ngushticës së Hormuzit. Në bisedë me Financial Times, Trump u shpreh: "Ndoshta do ta marrim ishullin Kharg, ndoshta jo. Ne kemi shumë opsione."
Sipas Wall Street Journal, Trump ka nxitur këshilltarët për të ushtruar presion mbi Iranin që të dorëzojë materialin bërthamor si kusht për përfundimin e luftës dhe ka folur për sekuestrim me forcë nëse Irani refuzon.