Java e 34-të e Albi Mall Superligës së Kosovës ka sjellë zhvillime të rëndësishme në garën për Evropë dhe në luftën për mbijetesë.
Dukagjini i Klinës ka mposhtur Dritën me rezultat 2-0. Golat janë shënuar nga Besir Iseni në minutën e 19-të dhe Altin Merlaku në minutën e 41-të. Me këtë fitore Dukagjini ka arritur 45 pikë dhe është ngjitur në vendin e pestë, ndërsa Drita ka mbetur me 66 pikë si kampione e edicionit.
Malisheva ka fituar bindshëm 4-1 ndaj Drenicës. Assane Diatta ka shënuar dy gola (55’ dhe 81’), ndërsa golat e tjerë i kanë realizuar Arlind Veliu dhe Xhemal Ibishi. Kreshnik Uka ka shënuar golin e vetëm për mysafirët në kohën shtesë. Me këtë rezultat Malisheva ka siguruar matematikisht pjesëmarrjen në kualifikimet e Ligës së Konferencës dhe renditet e treta me 56 pikë.
Ballkani ka mposhtur Prishtinën e Re 3-2, ndërsa Llapi ka fituar 2-1 në udhëtim kundër Gjilanit. Ndeshja midis Prishtinës dhe Ferizajt ka përfunduar 3-3. Me këto rezultate Ferizaj dhe Prishtina e Re kanë rënë në Ligën e Parë.
Në tabelë Ballkani është i dyti me 58 pikë, Prishtina e katërta me 46 pikë dhe Gjilani i gjashtë me 45 pikë. Pesë ekipe vazhdojnë të luftojnë për t’i ikur zonës së rrezikshme para dy xhirove të mbetura.