Në Gjykatën Kundër Korrupsionit dhe Krimit të Organizuar mbahet seanca e dosjes Partizani. Mbrojtja parashtron fakte për të kundërshtuar akuzën e SPAK-ut, ndërsa Jamarbër Malltezi mori fjalën dhe lexoi 200 faqe kundërshtime.
Malltezi deklaroi se "nuk është ndjekje penale, por përndjekje politike" dhe përmendi shkelje konventoresh ndërkombëtare. Ai u referua te Magna Carta e vitit 1215, e cila ndalon akuzat pa baza dhe dënimet pa fakte. Sipas tij, sot ekziston një situatë e ngjashme.
Ai akuzoi se prokurorja Enkeleda Millonai është emëruar nga Taulant Balla, i cili ka kallëzuar dosjen në emër të Partisë Socialiste. Për prokurorin Arben Kraja tha se ka qenë hetues i Sigurimit të Shtetit dhe nuk mund të jetë objektiv, pasi vetë Malltezi ka kundërshtuar sistemin komunist për grabitjen e pronave.
Prokurorja Enkeleda Millonai i tërhoqi vëmendjen për gjuhën e përdorur. Ajo kërkoi t’i tërhiqet vërejtje, sepse "objekti i këtij gjykimi nuk është akuza ndaj prokurorëve". Kërkoi që i pandehuri të bëjë parashtrime bazuar në faktet e procesit.
Gjykata i dha të drejtë SPAK-ut dhe ndaloi Jamarbër Malltezin të përdorë terma që nuk lidhen me objektin e gjykimit. Më parë, GJKKO e kishte ndaluar atë të drejtohej te prokurorët e SPAK si "prokurorë politikë".
Malltezi u kundërvajt: "Prokurorët politikë e kam artikuluar edhe më parë, pse qenka sakrilegj tani? Po dëshironi, shtoni një akuzë të re për agjitacion e propagandë, se kemi të pushkatuar më parë". Pas ndërhyrjeve të gjykatës, ai zëvendësoi termin me "prokurorët pika pika".
Malltezi tregoi një gazetë greke që botoi vendimin e gjykatës për dënimin e Irena Gjokës në Greqi për falsifikim dokumentesh. Ai tha se Gjoka fshehu faktin e shkarkimit nga Sali Berisha në 1996. Prokuroria e Përgjithshme ka deklaruar se vendimi me vulë apostile është autentik, por ka vonuar verifikimin.