Prokuroria e Posaçme Kundër Korrupsionit dhe Krimit të Rëndë Organizuar (SPAK) ka kërkuar pushimin e procedimit penal ndaj gjyqtare Irena Gjokës të Gjykatës së Posaçme Kundër Korrupsionit dhe Krimit të Rëndë Organizuar (GJKKO). Kërkesa do të shqyrtohet më 21 prill në orën 10:00 nga gjyqtarja Marinela Osmani. Në seancë pritet të jenë të pranishëm përfaqësues të SPAK-ut dhe pala kallëzuese.
Gjyqtarja Irena Gjoka u kallëzua në SPAK nga Partia Demokratike, e cila e akuzoi se kishte fshehur në formularin e dekriminalizimit një dënim të dhënë nga një gjykatë në Janinë të Greqisë në vitin 2005. Procesi gjyqësor grek përfshinte dy episode në kufi, ku Gjoka u konstatua se kishte përdorur dokumente të parregullta dhe kishte bërë tentativa për hyrje me të dhëna identifikuese të ndryshme.
SPAK konfirmon se Gjoka është deklaruar fajtore për veprën penale të parashikuar nga legjislacioni penal grek për "Hyrjen dhe qëndrimin e të huajve në territorin grek", me dënim burgim dhe gjobë, e konvertuar në gjobë sipas vendimit. Megjithatë, prokuroria argumenton se nuk ekzistojnë kushtet ligjore për vijimin e ndjekjes penale në Shqipëri, pasi nuk provohet kryerja e veprës penale nga magjistratja.
Ndër argumentet kryesore, SPAK thekson se në dëshmitë e penalitetit të lëshuara nga autoritetet greke nuk figurojnë të dhëna për dënim penal ndaj Gjokës me vendim të formës së prerë, siç ka deklaruar vetë ajo në formular. Procesi në Greqi u zhvillua në mungesë dhe Gjoka nuk ka qenë në dijeni. Edhe sikur të merret si e vërtetë ekzistenca e vendimit, ndjekja penale është e shuar për shkak të parashkrimit.
Gjoka ka qenë gjyqtarja e hetimeve paraprake në dosjen e privatizimit të ish-klubit Partizani dhe ka qenë objekt sulmesh nga kryetari i Partisë Demokratike, Sali Berisha.