Prokuroria e Posaçme Kundër Korrupsionit dhe Krimit të Organizuar (SPAK) ka paraqitur më 25 mars 2026 pranë Gjykatës së Posaçme të Shkallës së Parë (GJKKO) kërkesën për pushimin e procedimit penal nr. 130/2025 ndaj gjyqtares Irena Gjoka.
Ky procedim u regjistrua më 5 qershor 2025, mbi bazën e kallëzimit të Adriana Kalaja, kryetare e Komisionit të Apelimit dhe Vlerësimit të Statutit në Partinë Demokratike, protokolluar më 20 maj 2025. Kallëzimi përfshinte dyshime për falsifikimin e formularit të vetëdeklarimit në vitin 2016, shpërdorim detyre dhe ushtrim ndikimi të paligjshëm, për veprën penale të parashikuar në nenin 190 të Kodit Penal.
Gjatë hetimeve, SPAK ka administruar materiale të shumta, duke përfshirë kallëzime shtesë, dokumente nga institucione vendase si Prokuroria e Përgjithshme dhe Ministria e Drejtësisë, si dhe verifikime pranë autoriteteve greke përmes bashkëpunimit juridik ndërkombëtar.
Nga dokumentacioni grek rezulton se ndaj Irena Gjoka (alias Shpata ose Maneku) ekziston vendimi nr. 1447/2005 i Gjykatës së Shkallës së Parë në Janinë, ku ajo u shpall fajtore për përdorim dokumentesh të parregullta dhe hyrje/qëndrim të paligjshëm në Greqi, me dënim burgim dhe gjobë të konvertuar. Megjithatë, gjykimi u zhvillua në mungesë të saj, me njoftim sipas procedurave për persona me vendbanim të panjohur.
SPAK thekson mungesën e dokumentacionit që provon njoftimin real dhe efektiv të saj për procesin apo vendimin. Autoritetet greke kanë urdhëruar mosekzekutimin dhe arkivimin e vendimit sipas ligjit 3346/2005, për mungesë forme të prerë dhe parashkrim të veprës penale. Në dëshmitë e penalitetit greke nuk figuron dënim penal ndaj saj, ndërsa vetëdeklarimi i Gjokës për mungesë dënimi me formë të prerë rezulton i saktë.
Edhe sikur të merrej e mirëqenë ekzistenca e vendimit, ndjekja penale është e shuar për parashkrim. Prandaj, SPAK konstaton mungesë provash për kryerjen e veprës penale dhe kërkon pushimin e procedimit.
Përditësime
PD dhe ish-kryeministri Sali Berisha e kanë sulmuar përsëritur gjyqtaren Irena Gjoka për rolin e saj si gjyqtare paraprake në dosjen Partizani, ku ajo vendosi masat e sigurisë.
Autoritetet greke zbuluan dy episode në kufi ku gjyqtarja Irena Gjoka përdori dokumente të parregullta dhe u përpoq të hynte me të dhëna identifikuese të ndryshme.
Masa administrative:
- Dëbim i menjëhershëm.
- Ndalim hyrjeje në zonën Schengen.
Këto masa u kundërshtuan në gjykatat administrative greke.
GJKKO caktoi gjyqtaren Marinela Osmani si gjyqtare të posaçme për të shqyrtuar kërkesën e SPAK-ut për pushimin e procedimit ndaj gjyqtares Irena Gjoka.