Ministri i Mbrojtjes i Kosovës, Ejup Maqedonci, u takua të hënën me të Ngarkuarën me Punë të SHBA-së në Kosovë, Anu Prattipati. Në takim u diskutua partneriteti mes Kosovës dhe Shteteve të Bashkuara në fushën e mbrojtjes dhe mbështetja amerikane për zhvillimin e kapaciteteve të Forcës së Sigurisë së Kosovës (FSK).
Sipas njoftimit të Ambasadës së SHBA-së, partneriteti në fushën e mbrojtjes ishte në qendër të takimit. Ambasada tha se pret vazhdimin e bashkëpunimit dhe shprehu gatishmërinë për të mbështetur zhvillimin e mëtejshëm të kapaciteteve të FSK-së.
Maqedonci bëri të ditur në një postim në Facebook se bisedimet përfshinë forcimin e mëtejshëm të partneritetit strategjik mes Kosovës dhe SHBA-së, si dhe vazhdimin e mbështetjes amerikane për zhvillimin dhe avancimin e kapaciteteve të FSK-së. Ai tha se vëmendje e veçantë iu kushtua prioriteteve të Ministrisë së Mbrojtjes për katërvjeçarin e ardhshëm.
Sipas Maqedoncit, palët diskutuan edhe planifikimin strategjik për fazën pas përmbushjes së kapaciteteve të plota të FSK-së dhe përfundimit të planit dhjetëvjeçar të tranzicionit. Ai tha se partneriteti me Shtetet e Bashkuara mbetet thelbësor për avancimin e kapaciteteve mbrojtëse të Kosovës dhe për forcimin e kontributit të saj në paqen, sigurinë dhe stabilitetin rajonal e ndërkombëtar.