Ministri i Mbrojtjes i Kosovës, Ejup Maqedonci, u takua me Përfaqësuesin e Përhershëm të SHBA-së në NATO, ambasadorin Matthew Whitaker, në margjinat e Warsaw Security Forum 2026. Sipas Ministrisë së Mbrojtjes, në fokus të takimit ishte avancimi i bashkëpunimit në fushën e mbrojtjes dhe koordinimi për çështje me interes të përbashkët.
Maqedonci shprehu mirënjohje për mbështetjen dhe kontributin e vazhdueshëm të SHBA-së për Kosovën, Ministrinë e Mbrojtjes dhe Forcën e Sigurisë së Kosovës. Ai veçoi bashkëpunimin me Gardën Kombëtare të Iowa-s, i cili zhvillohet prej më shumë se 15 vjetësh në kuadër të Programit të Partneritetit Shtetëror. Sipas njoftimit, partneriteti përfshin trajnime, ushtrime të përbashkëta dhe shkëmbim përvojash.
Whitaker shprehu mbështetje për rrugën e Kosovës drejt integrimit në NATO dhe për vazhdimin e ndihmës amerikane në zhvillimin e kapaciteteve mbrojtëse të vendit. Në takim u trajtati gjithashtu zgjerimi i qasjes së ushtarakëve kosovarë në programet dhe shkollat e NATO-s, si dhe bashkëpunimi me Aleancën lidhur me praninë dhe optimizimin e KFOR-it dhe normalizimin e hapësirës ajrore të Kosovës.
Sipas Ministrisë së Mbrojtjes, bisedimet përfshinë zhvillimin e kapaciteteve, sistemet e blera nga SHBA-ja dhe procedurat e nisura për blerjen e helikopterëve Black Hawk. U theksua edhe rëndësia e mbështetjes për zhvillimin e industrisë vendore të mbrojtjes.
Maqedonci shprehu interesim për të shqyrtuar mundësi bashkëpunimi sipas parimit të ndarjes së përgjegjësive, përfshirë në kampin Bondsteel dhe në Aeroportin e Gjakovës. Ai theksoi gjithashtu rëndësinë e kontributit të Kosovës në Forcën Ndërkombëtare Stabilizuese në Gaza, si dëshmi e gatishmërisë së vendit për të marrë përgjegjësi dhe për të kontribuar në paqen dhe sigurinë ndërkombëtare.
Në përfundim të takimit, Maqedonci e ftoi Whitakerin të vizitojë Kosovën për të vazhduar dialogun dhe për të avancuar bashkëpunimin mes dy vendeve.