Ministri i Mbrojtjes së Kosovës, Ejup Maqedonci, deklaroi se raketat balistike të blera së fundmi nga Serbia nga Kina janë të dizajnuara për sulme dhe paraqesin kërcënim jo vetëm për Kosovën, por për të gjithë rajonin e Ballkanit. Deklarata u bë në intervistë për emisionin Puls në A2 CNN me gazetaren Bruna Çifligu.
Sipas Maqedoncit, blerja e këtyre sistemeve nuk është zhvillim i ri. Serbia vazhdon prej vitesh të furnizohet me armatim nga Rusia, Kina dhe vende të tjera. "Ne kemi informacion se prej disa vitesh ka bërë blerje të raketave të ndryshme nga Kina", tha ai.
Ai e lidh këtë me qasjen hegjemoniste të Serbisë për të dominuar në Ballkanin Perëndimor në aspektet ushtarake, ekonomike dhe të tjera. Blerja e armëve nga vende jashtë NATO-s, e kombinuar me politikat ndaj fqinjëve, e bën situatën të rrezikshme për rajonin.
Maqedonci hodhi poshtë pretendimet e presidentit serb Aleksandar Vuçiq, i cili ka thënë se armatimi shërben për mbrojtje nga marrëveshja trilaterale mes Kosovës, Shqipërisë dhe Kroacisë. "Këto blerje nuk janë bërë vetëm pas nënshkrimit të marrëveshjes, por edhe më herët", u shpreh ai.
Ministri kërkoi që NATO ta marrë seriozisht jo vetëm këtë blerje, por të gjithë procesin e militarizimit të Serbisë dhe ta diskutojë në mënyrë të thellë.