Ministri i Mbrojtjes i Kosovës, Ejup Maqedonci, zhvilloi një takim me homologun e tij belg, Theo Francken, në margjinat e panairit BEDEX 2026, i cili po mbahet në Bruksel.
Në takim u diskutua për thellimin e bashkëpunimit ndërmjet dy vendeve në fushën e mbrojtjes dhe sigurisë. Fokus i veçantë u vu në zhvillimin e industrisë së mbrojtjes, rritjen e bashkëpunimit ndërmjet ushtrive përmes trajnimeve të përbashkëta, si dhe mundësitë për shkëmbimin e oficerëve për shkollim dhe avancim profesional.
Një hap i rëndësishëm në këtë drejtim është akreditimi i Atasheut të Mbrojtjes të Republikës së Kosovës në Belgjikë, i cili pritet të zyrtarizohet së shpejti. Ky akreditim do të kontribuojë drejtpërdrejt në forcimin e bashkëpunimit institucional dhe ushtarak.
Sipas njoftimit të Ministrisë së Mbrojtjes së Kosovës, vendi po ndërton partneritete të forta me aleatët dhe avancon drejt forcimit të kapaciteteve të mbrojtjes dhe integrimit euroatlantik. "Së bashku me aleatët tanë, për më shumë siguri, stabilitet dhe zhvillim."