Në Maqedoninë e Veriut është regjistruar rasti i dytë i vdekjes si pasojë e infektimit me virusin e etheve të Nilit Perëndimor. Pacienti, një 72-vjeçar nga Shkupi, ishte shtruar në Klinikën e Sëmundjeve Infektive në gjendje të rëndë shëndetësore. Sipas drejtorit të klinikës, Fadil Cana, i ndjeri shfaqi që në pranim simptoma të theksuara neurologjike, duke përfshirë inflamacion të trurit dhe të mbështjellësve të tij.
Pavarësisht përpjekjeve mjekësore dhe trajtimit intensiv, gjendja e pacientit u përkeqësua në mënyrë progresive. Ky është rasti i dytë fatal në vend, pas humbjes së jetës së një pacienti 83-vjeçar pak ditë më parë. Aktualisht, në këtë institucion shëndetësor po trajtohen 24 pacientë, shumica e të cilëve janë të moshës mbi 60-vjeçare dhe vuajnë nga sëmundje shoqëruese ose komorbiditete. Prej tyre, 19 raste janë të konfirmuara laboratorikisht, ndërsa 5 pacientë të tjerë mbeten nën vëzhgim dhe proces diagnostikimi.
Ethet e Nilit Perëndimor janë një infeksion viral që transmetohet te njerëzit përmes pickimit të mushkonjave të infektuara. Institucionet shëndetëore theksojnë rëndësinë e masave parandaluese, siç janë përdorimi i repelentëve, veshja e rrobave mbrojtëse, vendosja e rrjetave në dritare dhe eliminimi i ujërave të ndenjura ku mund të shumohen mushkonjat. Simptomat që kërkojnë ndihmë të menjëhershme mjekësore përfshijnë temperaturën e lartë, dhimbjen e kokës, konfuzionin dhe dobësinë muskulore.