Numri i vdekjeve nga ethet e Nilit Perëndimor në vend ka arritur në pesë, pas ndarjes nga jeta të një pacienti 73-vjeçar nga lagjja Lisiçe e Re (Novo Lisiçe) në Shkup. Njoftimi është bërë nga drejtori i Klinikës për Sëmundje Infektive, Fadil Cana, i cili bëri me dije se i ndjeri ka qëndruar në spital për 22 ditë dhe ka qenë në gjendje shëndetësore jashtëzakonisht të rëndë për shkak të sëmundjeve shoqëruese kronike. Pacienti ishte trajtuar në Njësinë e Kujdesit Intensiv me mbështetje respiratore.
Aktualisht, në Klinikën për Sëmundje Infektive janë të shtruar 21 pacientë. Nga ky total, 18 persona kanë të konfirmuar infeksionin me formën neuroinvazive të virusit, ndërsa tre të tjerë konsiderohen raste të dyshuara. Sipas drejtorit Cana, klinika përballet me pranime të përditshme të pacientëve të rinj. Aktualisht, katër pacientë ndodhen në gjendje të rëndë shëndetësore në repartin e kujdesit intensiv. Ndërsa pjesa më e madhe e të prekurve janë të moshuar, raportohet se midis të shtruarve ka pasur edhe pacientë të rinj, me moshën më të re të regjistruar prej 25 vjeç. Deri në këtë datë, në vend janë shëruar dhe liruar nga spitali 19 pacientë.
Përditësime
Autoritetet shëndetësore njoftuan se numri i rasteve të konfirmuara me ethet e Nilit Perëndimor ka arritur në 43. Ky bilanc përfaqëson vetëm 1% të totalit të të infektuarve në Maqedoninë e Veriut. Ministria e Shëndetësisë u bëri thirrje komunave të intensifikojnë masat e spërkatjes kundër mushkonjave për të frenuar përhapjen e virusit.