Autoritetet e Maqedonisë së Veriut njoftuan shkatërrimin e një grupi të organizuar, i cili dyshohet se ndiqte ideologjinë e organizatës terroriste Shteti Islamik (IS). Operacioni policor, i zhvilluar në datën 28 shtator, u shtri në 12 lokacione të ndryshme në qytetin e Shkupit.
Si rezultat i këtij aksioni, policia arrestoi 5 të dyshuar, ndërsa janë ngritur kallëzime penale ndaj 3 personave të tjerë. Ndër të akuzuarit kryesorë është një 34-vjeçar me inicialet K.I., i cili dyshohet për vepra penale të terrorizmit dhe tregti të paligjshme të armëve. Sipas hetimeve, i dyshuari kishte vepruar në një degë të lidhur me ideologjinë e IS-it që nga viti 2023, duke u angazhuar në indoktrinimin e të rinjve dhe përhapjen e propagandës ekstremiste.
Në operacion u sekuestrua një sasi e konsiderueshme armatimi dhe pajisjesh, si:
• Pushkë automatike, snajper dhe pistoleta
• Municion të ndryshëm
• Pajisje radiokomunikimi dhe taktike
• Pajisje elektronike dhe flamur i IS-it
• Sasi të konsiderueshme parash
Në operacionin e bashkërenduar, përveç K.I.-së, janë akuzuar edhe shtetasit B.A., 24 vjeç, dhe E.S., 30 vjeç, për posedim dhe tregti të paautorizuar të armëve dhe municionit. Autoritetet sqaruan se, deri në këtë fazë të hetimeve, nuk ka të dhëna për plane konkrete për sulme të menjëhershme ose shënjestra të specifikuara.
Krahas akuzave për terrorizëm dhe armëmbajtje pa leje, policia konstatoi edhe shkelje që lidhen me përdorimin e paautorizuar të energjisë elektrike gjatë kontrolleve në objektet e përfshira. Për këto shkelje, institucionet përkatëse kanë bërë të ditur se do të ndërmerren masa ligjore shtesë.