Prokuroria e Tiranës ka kërkuar konfiskimin e pasurisë së familjarëve të Sajmir Alimehmetit, i dënuar me 22 vite burg në SHBA për pjesëmarrje në akte terrorizmi dhe ndihmë materiale ndaj ISIS.
Ai njihej ndryshe si “bombë me sahat” dhe ishte nën vëzhgim të autoriteteve që nga viti 2014, kur iu refuzua hyrja në Britani dy herë për shkak se synonte të udhëtonte drejt Sirisë. Ai pranoi se kishte dhuruar ndihmë për Shtetin Islamik të Sirisë dhe Irakut.
Biografia dhe aktivitetet
Sajmir Alimehmeti, i lindur në Shqipëri, jetonte në një lagje të Bronx-it në New York, të njohur si geto. Punonte si ndihmës-hidraulik dhe përgatitej për punë në një zyrë funerale. Që nga viti 2014 tregoi mbështetje për ISIS.
Përdorte emrin alternatif Abdul Qawii dhe përpiqej të merrte pasaportë të re me të dhëna të falsifikuara për të lehtësuar lëvizjet, pasi emri i tij rezultonte në sistemet e sigurisë.
Arrestimi dhe provat
Në majin e vitit 2016, u arrestua nga Ekipi i Posaçëm i Përbashkët kundër Terrorizmit në Bronx. Prokuroria amerikane e akuzoi për ndihmë materiale ndaj ISIS, pasi koleksiononte thika luftimi, maska, doreza dhe sende të tjera që mund të përdoren në sulme terroriste.
Në shtëpinë e tij u gjetën flamuj të ISIS, video të grupit terrorist, materiale propagandistike dhe një foto e tij me flamurin e ISIS. Në telefonin celular iu gjetën regjistrime të Anwar al-Awlaki, i cili u vra në vitin 2011.
Ai tentoi të udhëtonte drejt Lindjes së Mesme për t’u bërë anëtar i ISIS, por u pengua nga autoritetet britanike. Gjithashtu, planifikoi të kthehej në Shqipëri bashkë me vëllain për të vazhduar drejt Rakës në Siri, por vëllai u arrestua.