Ngjarja është regjistruar mbrëmjen e së shtunës në zonën e Ali Demit në kryeqytet, ku shërbimet e Komisariatit të Policisë Nr. 1 ndërhynë pas njoftimeve se një person po qëllonte me armë nga automjeti i tij.
Sipas hetimeve paraprake, Amarild Xhamaqi hapi xhamin e mjetit dhe qëlloi disa herë në ajër. Autoritetet bënë të mundur lokalizimin dhe prangosjen e tij në të njëjtën zonë pak pas incidentit. Përveç armës së zjarrit, policia ka sekuestruar edhe automjetin e përdorur nga i arrestuari.
Ndërsa raportohet se i riu nuk ka dhënë shpjegime të detajuara para hetuesve, motivi dyshohet të jetë humbja e parave në skedinat sportive. Nuk raportohet për persona të lënduar nga të shtënat. Materialet procedurale i kanë kaluar Prokurorisë për veprime të mëtejshme ligjore.
Përditësime
Policia e Tiranës saktësoi se të shtënat me armë kanë ndodhur mbrëmjen e së dielës, dhe jo të shtunën siç u raportua fillimisht.