Sipas të dhënave të publikuara nga Qendra për Menaxhim me Kriza (QMK) më 24 gusht 2026, situata me zjarret në Maqedoninë e Veriut është nën monitorim të vazhdueshëm. Nga 33 zjarret e regjistruara në mjedise të hapura gjatë ditës së fundit, 25 janë shuar plotësisht nga ekipet e ndërhyrjes.
Aktualisht, vatrat aktive janë të përqendruara në këto zona:
• Komunat Studeniçan dhe Zelenikovë: pranë fshatrave Moranë, Vërtekicë, Gaber, Paligrad dhe Vërazhallë.
• Komuna e Makedonski Brodit: në vendin Vidush dhe pranë fshatrave Dragov Doll dhe Lokvicë.
• Komuna e Kërçovës: pranë fshatit Tajmishte dhe vendit Darda.
• Komuna e Gostivarit: pranë fshatit Gorna Gjonovica.
Ndërkohë, autoritetet kanë njoftuar se katër vatra të tjera janë vënë nën kontroll, konkretisht në fshatin Ilinden, pranë fshatit Bigla në Dellçevë, pranë fshatit Tudencë në komunën e Jegunovcit dhe pranë fshatrave Lomnicë dhe Gjergjevishtë në komunën e Vrapçishtit.
Një moment kritik u regjistrua në fshatin Bonçe të Prilepit, ku zjarri iu afrua shtëpive të banimit gjatë orëve të hershme të mëngjesit. Drejtori i Drejtorisë për Mbrojtje dhe Shpëtim, Stojançe Angellov, deklaroi se ndërhyrja e koordinuar e zjarrfikësve nga Prilepi e Kavadari, si dhe e vullnetarëve nga Manastiri e Koçani, parandaloi dëme të mëdha në zonën ku ndodhen rreth 50 shtëpi.
Për shkak të rrezikut të vazhdueshëm nga zjarret pyjore dhe temperaturave të larta, Qeveria e Republikës së Maqedonisë së Veriut ka shpallur gjendje të krizës në mbarë vendin, e cila mbetet në fuqi deri në fund të muajit gusht. Institucionet kanë bërë thirrje për kujdes të shtuar nga ana e qytetarëve.
Përditësime
Qendra për Menaxhim me Kriza (QMK) njoftoi se aktualisht janë aktive 10 zjarre në territorin e vendit. Vatrat e reja janë shfaqur në Studeniçan, Zelenikovë, Makedonski Brod, Kërçovë, Zhelinë dhe Likovë. Ekipet e zjarrfikësve arritën të shuajnë një zjarr të madh në afërsi të Strumicës, ku flakët kishin depërtuar deri në oborret e shtëpive në zonën e Sofilarit. Drejtoria për Mbrojtje dhe Shpëtim (DMSH) konfirmoi se, përkundër rrezikut të lartë, nuk ka viktima, të lënduar apo shtëpi të shkrumbuar.
Autoritetet e menaxhimit të krizave kanë konfirmuar se gjatë 24 orëve të fundit janë regjistruar gjithsej 33 zjarre në mbarë vendin. Sipas të dhënave më të fundit, aktualisht janë aktive 4 vatra zjarri, ndërsa 4 të tjera janë vënë nën kontroll dhe 25 vatra janë shuar plotësisht. Njësitë zjarrfikëse po përqendrojnë operacionet e shuarjes në fshatrat e komunave të Studeniçanit, Zelenikovës, Makedonski Brodit, Kërçovës dhe Gostivarit.