Sipas raportit të fundit nga Qendra për Menaxhim me Kriza (QMK), aktivitetet për shuarjen e zjarreve kanë qenë intensive gjatë ditës së fundit. Dy vatrat që vijojnë të jenë aktive janë të përqendruara në Komunën e Sarajit, përkatësisht në hapësirën mes fshatrave Kopanicë dhe Radushë, ku është përfshirë pyll me trungje të ulëta, si dhe në rajonin e Shtipit, mes fshatrave Sellcë, Puhçë, Stepancë dhe Lakavicë, ku po digjet vegjetacion i ulët.
Ndërkohë, katër vatra të tjera janë vënë nën kontroll nga ekipet e ndërhyrjes. Këto zjarre gjenden në:
- Zonën mes fshatrave Bitovë, Zagrad dhe Strajanë në Komunën e Makedonski Brodit;
- Deponinë e qytetit "Ostrec" në Dellçevë;
- Pranë fshatit Dragov Dol në Komunën e Makedonski Brodit;
- Mbi fshatin Paligrad në Komunën e Zelenikovës.
Sipas të dhënave të autoriteteve, pjesa dërrmuese e zjarreve janë shuar plotësisht. Në një njoftim të veçantë, Drejtoria për Mbrojtje dhe Shpëtim ka apeluar për kujdes të shtuar nga ana e qytetarëve. Për shkak të kushteve atmosferike dhe temperaturave të ngrohta, ndalesa për lëvizje në pyje është zgjatur zyrtarisht deri më 30 shtator.