Deputetja e pavarur Marjana Koçeku ka ndarë qëndrimet e saj lidhur me situatën politike dhe sociale në vend, në një intervistë për të përditshmen britanike Financial Times. Në qendër të prononcimit të saj janë protestat që po zhvillohen prej më shumë se një muaji në Tiranë, për të cilat ajo shprehet se pasqyrojnë një ndryshim thelbësor te brezi i ri.
Sipas Koçekut, ndryshe nga prirjet për emigrim pas vitit 1991, të rinjtë shqiptarë aktualisht janë të përqendruar në përmirësimin e kushteve të jetesës brenda vendit. Ajo e cilësoi këtë angazhim si një histori personale dhe një përpjekje për ta shndërruar Shqipërinë në një vend të jetueshëm. Koçeku theksoi se prindërit i kanë rritur fëmijët me idenë se lumturia është përtej kufijve, ndërsa protestat po tregojnë se shqiptarët po e shohin tokën e tyre si një vend për të jetuar.
Në artikullin e Financial Times raportohet se protestat kanë sjellë ndikim edhe në dinamikat e zhvillimit urban. Sipas gazetës, punimet e ndërtimit në disa zona janë ndalur, ndërsa janë hequr materialet dhe gardhet që pengonin hapësirat. Kjo situatë pason thirrjen e Parlamentit Europian në mesin e muajit qershor, i cili kërkoi një moratorium për të gjitha punimet dhe lejet e reja të ndërtimit në zonat e mbrojtura, si dhe shfuqizimin e amendamentit 'me pesë yje'.