Deputetja e pavarur Marjana Koçeku ka reaguar përmes një postimi në rrjetin social Facebook ndaj thirrjes së fundit të kryeministrit Edi Rama, i cili u kërkoi shqiptarëve t’i japin “besën” në kuadër të një mesazhi të ri politik. Koçeku e ka vlerësuar këtë qasje si të papërshtatshme, duke theksuar se besa nuk mund të shndërrohet në një slogan politik.
Sipas deputetes, besa përfaqëson një marrëveshje të pashkruar mes njerëzve, e cila rrënjët i ka te tradita, vendlindja dhe lidhja me natyrën. Ajo argumenton se ky koncept është thellësisht natyror dhe i shenjtë, duke qenë tradicionalisht i lidhur me tokën, malin dhe gurin, të cilët janë konsideruar si dëshmitarë të fjalës së dhënë.
Koçeku ka shprehur qëndrim kritik ndaj atyre që, sipas saj, e shohin tokën thjesht si truall për ndërtime kullash shumëkatëshe ose resorte turistike. Ajo thekson se personat që kanë humbur lidhjen me vendin e tyre dhe natyrën, nuk mund ta kuptojnë peshën morale të besës.
“Ata që e shohin tokën veç si truall për kulla shumëkatëshe e resorte, zor se munden me e kuptu këtë koncept që për ne malsorët asht jashtë mase i shenjtë”, shkruan deputetja. Ajo përkujtoi se në traditën shqiptare, besa ka shërbyer edhe si mekanizëm për pajtimin në konflikte, ku palët ktheheshin te kulla e të parëve, te logu apo te kisha e fshatit për të kërkuar fjalën e dhënë. Në përfundim, ajo thekson se lidhja me tokën është themeli i besës, duke shtuar se atyre që e humbin këtë lidhje nuk mund t'u zihet besë.