Deputetja e pavarur Marjana Koçeku ka reaguar në rrjetet sociale pas prezantimit të dokumentit të ri strategjik me emrin BESA, të cilin kryeministri Edi Rama e dorëzoi një ditë më parë përpara anëtarëve të Grupit Parlamentar të Partisë Socialiste dhe kabinetit qeveritar.
Në një qëndrim kritik ndaj qeverisë, Koçeku ka vënë në pikëpyetje mënyrën se si përdoret ky koncept, duke e cilësuar atë si një kontratë të pashkruar dhe thellësisht natyrore. Sipas saj, në traditën shqiptare, besa ka qenë historikisht e lidhur me tokën, malin dhe gurin. Deputetja thekson se ata që e shohin territorin vetëm si truall për kulla shumëkatëshe dhe resorte, nuk mund ta kuptojnë këtë koncept të shenjtë.
“Flasin për besën njerëz që nuk ia kanë idenë çka asht besa”, ka shkruar Koçeku, duke shtuar se besa e dhënë në ambientet e kullave luksoze nuk përputhet me vlerat tradicionale. Ajo e ka krahasuar këtë përqasje me skenarët e filmave për mafiozët dhe spekulantët financiarë.
Deputetja, e cila vjen nga një prej zonave malore, ka theksuar se kodi i malësisë kërkon rikthimin te rrënjët, te kullat e vjetra apo kishat e fshatit, për të rivendosur lidhjen shpirtërore të humbur. Ajo e ka mbyllur reagimin e saj me mesazhin se njerëzve që humbasin lidhjen me tokën dhe natyrën, nuk mund t’u zihet besë. Ky reagim pason largimin e saj nga grupi parlamentar i Partisë Socialiste, vendim i marrë disa javë më parë nga deputetja.