Deputetja Marjana Koçeku ka reaguar publikisht ndaj vendimit të qeverisë për të mbështetur financiarisht organizimin e koncertit të këngëtarit Kanye West. Sipas deputetes, shuma prej 4 milionë eurosh e nxjerrë nga fondi rezervë do të duhej të ishte investuar për parandalimin e zjarreve, mbështetjen e banorëve dhe forcimin e kapaciteteve të emergjencave.
Në deklaratën e saj, Koçeku vuri në dukje rrezikun e situatave të ngjashme me katastrofën e zjarreve të vitit të kaluar, duke paralajmëruar se temperaturat e larta e bëjnë ndërhyrjen e shtetit në fushën e emergjencave më të domosdoshme se kurrë. Ajo e konsideroi investimin në këtë koncert si shpenzim për një "stadium njëpërdorimsh".
Ky qëndrim vjen në një kohë kur deputetja Koçeku është distancuar nga Grupi Parlamentar i Partisë Socialiste. Përmes kësaj deklarate, ajo nënvizoi se "shteti dhe llogaridhënia nuk zëvendësohen me spektakël", duke shtuar se humbja e natyrës përfaqëson një humbje të drejtpërdrejtë për interesat e Shqipërisë.