Deputetja e pavarur, Marjana Koçeku, ka reaguar ndaj deklaratave të deputetit socialist Erion Braçe, i cili më herët ngriti pikëpyetje nëse subjekti “Neomalsore Agroturizëm”, që lidhet me të, disponon certifikatë pronësie për tokën ku ushtron aktivitetin. Në një reagim publik, Koçeku e ka kundërshtuar me ironi qëndrimin e Braçes, duke theksuar se familja e saj jeton prej tre brezash në atë zonë, por ende nuk disponon dokumentacion të rregullt pronësie.
Në mesazhin e saj, deputetja ngriti çështjen e përgjegjësisë shtetërore në lidhje me problematikat e pronave, duke pyetur nëse kjo situatë është pasojë e mungesës së vullnetit nga ana e qytetarëve apo nga institucionet. “Jo, zoti Braçe, nuk i kam letrat. Nëna ime ka ardhur vajzë aty, është bërë nënë dhe është bërë gjyshe. Ka tre breza aty dhe zero dokumente”, shkroi ajo. Ajo përmendi se kjo gjendje vjen që nga koha e Ramiz Alisë, Shaban Tapias e deri te Erion Llafia.
Koçeku shtoi se problematika e pronësisë ka vazhduar ndër dekada. Deputetja iu drejtua drejtpërdrejt Braçes duke i kërkuar shpjegime për mungesën e vullnetit politik për zgjidhjen e këtyre problemeve, duke pasur parasysh edhe jetëgjatësinë e tij në legjislaturë. “Ma shpjego ti mua, që e ke në legjislaturë pothuajse aq sa unë kam vite jetë”, shprehet deputetja në reagimin e saj.
Përditësime
Debati rreth subjektit “Neomalsore Agroturizëm”, në afërsi të liqenit të Komanit, është intensifikuar pas një deklarate të deputetit socialist Erion Braçe. Në përgjigje, deputetja e pavarur Marjana Koçeku ka replikuar ndaj Braçes, duke vënë në pikëpyetje qëndrimin e tij mbi statusin e pronësisë së këtij subjekti.