Ministri i Bujqësisë dhe Zhvillimit Rural, Andis Salla, së bashku me kryetaren e Bashkisë Vlorë, Brunilda Mersini, inspektuan sot Markatën e Peshkut në Vlorë. Ky inspektim shënoi finalizimin e procesit për kalimin e kësaj strukture në pronësi të pushtetit vendor.
Objekti është i integruar me Portin e Peshkimit dhe Portin e Ri Tregtar të Vlorës. Me një sipërfaqe prej 1,300 m², qendra është e pajisur me 15 dhoma frigoriferike. Ky investim, i cili kap vlerën e 1.5 milionë eurove, synon të formalizojë tregun e peshkimit dhe të përmirësojë sigurinë ushqimore në përputhje me standardet e Bashkimit Europian.
Kryeministri Edi Rama vlerësoi projektin si një hap drejt zhvillimit të ekonomisë blu dhe modernizimit të zinxhirit të peshkimit. Sipas ministrit Salla, qendra e re do të lehtësojë ndjeshëm punën e peshkatarëve, duke i shmangur ata nga nevoja për investime individuale në ambiente magazinimi apo procedura të veçanta certifikimi. Infrastruktura do të shërbejë për grumbullimin, ruajtjen, përpunimin dhe tregtimin e produkteve, duke hapur mundësi për eksport të drejtpërdrejtë drejt tregut europian.