Ministri i Bujqësisë dhe Zhvillimit Rural, Andis Salla, dhe ministri i Punëve të Brendshme, Besfort Lamallari, zhvilluan një inspektim të përbashkët në Pikën e Inspektimit Kufitar në Qafë Thanë. Në këtë vizitë morën pjesë përfaqësues të Policisë së Shtetit, Doganave dhe Autoritetit Kombëtar të Ushqimit (AKU), me qëllim forcimin e kontrolleve dhe koordinimin ndërinstitucional në një nga nyjet kryesore të qarkullimit të mallrave në vend.
Sipas ministrit Salla, investimet e mbështetura nga Banka Botërore do të transformojnë infrastrukturën në këtë pikë kufitare. Synimi është krijimi i ambienteve të dedikuara për magazinimin dhe kontrollin e produkteve, duke mundësuar kryerjen e analizave të sigurisë ushqimore direkt në vend. Kjo masë pritet të shmangë vonesat në lëvizjen e importeve dhe eksporteve, duke garantuar se produktet që hyjnë në tregun shqiptar përmbushin standardet europiane.
Në kuadër të këtij plani, ministri Salla bëri të ditur se do të ndërtohen 7 laboratorë të rinj në të gjithë territorin e Shqipërisë, të cilët do të zëvendësojnë laboratorët aktualë për të rritur kapacitetet e monitorimit të mallrave.
Nga ana tjetër, ministri Lamallari theksoi rëndësinë e këtij bashkëpunimi për luftën kundër kontrabandës dhe evazionit fiskal. Ai njoftoi se po punohet për finalizimin e një marrëveshjeje me Maqedoninë e Veriut, e cila synon të lehtësojë procedurat kufitare dhe të përshpejtojë qarkullimin e pasagjerëve dhe mallrave mes dy vendeve.