Në qytetin e Vlorës u zhvillua një takim për koordinimin e masave të sigurisë ushqimore, ku morën pjesë ministri i Bujqësisë dhe Zhvillimit Rural, Andis Salla, kryetarja e bashkisë, Brunilda Mersini, drejtoresha e përgjithshme e Autoritetit Kombëtar të Ushqimit (AKU), Blerina Gjylameti, si dhe drejtues vendorë e operatorë të biznesit.
Takimi u fokusua në zbatimin e planit "Siguria Ushqimore 2026" dhe procesin e kategorizimit të bizneseve. Ministri Salla kërkoi angazhim maksimal për kontrolle të vazhdueshme dhe të paanshme në terren gjatë gjithë sezonit veror. Ai theksoi se garantimi i standardeve shëndetësore është investim në reputacionin e vendit dhe zhvillimin afatgjatë të ekonomisë.
"Objektivi ynë është të ndërtojmë një kulturë standardesh, ku biznesi e kupton se respektimi i rregullave është investim në cilësi," deklaroi ministri Salla.
Nga ana e saj, drejtoresha e AKU-së, Blerina Gjylameti, bëri të ditur të dhënat për qarkun e Vlorës, ku operojnë 1102 operatorë ushqimorë. Sipas saj, 882 subjekte janë klasifikuar me risk të mesëm, ndërsa pjesa tjetër përbëhet nga restorante, markete dhe furra buke. Gjylameti nënvizoi se AKU ka ndryshuar metodologjinë për të qenë partnere me biznesin, duke u përqendruar te informimi dhe parandalimi i shkeljeve, në një vit ku Shqipëria pret mbi 15 milionë vizitorë.