Ministri i Turizmit, Kulturës dhe Sportit, Blendi Gonxhja, ka drejtuar këtë të hënë mbledhjen e Task-Forcës Ndërinstitucionale për sezonin turistik të vitit 2026. Qëllimi i takimit ishte bashkërendimi i veprimeve midis institucioneve për të garantuar mbarëvajtjen e sezonit veror në të gjithë territorin e vendit.
Gjatë diskutimeve u theksuan prioritetet kryesore:
• Siguria në plazhe dhe në det, përfshirë respektimin e distancave nga mjetet lundruese.
• Pastërtia dhe kujdesi ndaj mjedisit në zonat turistike.
• Kontrolli i ndotjes akustike dhe siguria ushqimore.
• Funksionimi i qendrave shëndetësore sezonale.
• Menaxhimi i trafikut dhe i fluksit të vizitorëve në pikat kufitare.
Ministri Gonxhja deklaroi se qeveria do të ketë një mekanizëm monitorimi, raportimi dhe kontrolli në kohë reale. Ky mekanizëm do t'i shërbejë qeverisë, bashkive dhe institucioneve për të ndjekur hap pas hapi çdo emergjencë apo problematikë, me synim reagimin e shpejtë dhe zgjidhjen e situatave.
Sipas të dhënave, Shqipëria vijon të shënojë rritje të vizitorëve. Në vitin 2025, vendi mirëpriti mbi 12 milionë turistë, ndërsa për sezonin aktual parashikohet tejkalimi i këtyre shifrave. Grupi i punës do të vijojë monitorimin dhe koordinimin e strukturave gjatë gjithë periudhës së verës për të siguruar standarde më të larta shërbimi.