Qeveria e Shqipërisë ka miratuar një vendim për pezullimin e përkohshëm të punimeve të ndërtimit dhe aktiviteteve të lidhura me to në zonat turistike gjatë sezonit veror. Kjo masë, e cila ka hyrë në fuqi menjëherë, do të qëndrojë në zbatim deri më 15 shtator 2026. Lajmi u bë i ditur nga ministri i Turizmit, Kulturës dhe Sportit, Blendi Gonxhja, i cili theksoi rëndësinë e këtij vendimi për mbrojtjen e destinacioneve turistike dhe garantimin e një mjedisi cilësor për pushuesit dhe qytetarët.
Sipas vendimit të Këshillit të Ministrave, ndalimi shtrihet mbi disa kategori specifike të aktiviteteve ndërtimore, të cilat konsiderohen si ndikuese negative në mjedis gjatë sezonit të verës. Konkretisht, pezullimi përfshin:
• Punimet në karriera dhe pikat e nxjerrjes, përpunimit apo shfrytëzimit të inerteve.
• Aktivitetet e ndërtimit që fillojnë nga faza e gërmimeve dhe hedhjes së themeleve deri në përfundimin e ngritjes së karabinasë.
• Çdo lloj pune që shkakton ndotje akustike, pluhur apo ndikime të tjera negative në mjedisin përreth.
Nga kjo masë përjashtohen punimet e rifiniturave të brendshme dhe ndërhyrjet e vogla pas përfundimit të karabinasë, me kusht që subjektet të jenë të pajisura me lejet përkatëse dhe të mos shkaktojnë shqetësime për zonat e banuara ose turistike.
Ministri Blendi Gonxhja njoftoi se vendimi përcakton qartë zonat ku zbatohet masa, rregullat për lejet e ndërtimit, si dhe sanksionet administrative në rast të shkeljeve. Zbatimi i këtij vendimi do të monitorohet nga institucionet përgjegjëse, ndërsa të gjitha subjektet ndërtimore janë thirrur të bashkëpunojnë dhe të respektojnë kërkesat e legjislacionit në fuqi për të siguruar një sezon turistik me standarde të larta.
Përditësime
Qeveria ka detajuar kuadrin rregullator për pezullimin e ndërtimeve deri më 15 shtator, bazuar në ligjin nr. 83/2026. Masa është përqendruar në zonat me funksion turistik, qendrat historike dhe ato urbane. Sipas vendimit, periudha e pezullimit do të njihet si afat shtesë për vlefshmërinë e lejeve të ndërtimit, ndërsa instalimi ose sistemimi i kantiereve lejohet vetëm në fashën orare 08:00–17:00. Subjektet që shkelin këto rregulla do të ndëshkohen me gjobë administrative prej 2 milionë lekësh.