Në kuadër të mbarëvajtjes së sezonit turistik veror 2026, Bashkia Vlorë ka ndërmarrë një sërë masash administrative që prekin sektorin e ndërtimit dhe lëvizjen e mjeteve të transportit të mallrave. Nga data 5 qershor deri më 15 shtator 2026, të gjitha punimet e ndërtimit në zonat urbane dhe turistike do të pezullohen përkohësisht. Ky vendim përfshin zona si Lungomarja, Skela, Uji i Ftohtë, Plazhi i Vjetër, Radhima, Orikumi, Jonufra, Narta dhe Zvërneci. Përjashtim nga ky rregull bëjnë vetëm projektet e infrastrukturës dhe shërbimet publike të autorizuara nga bashkia.
Lidhur me qarkullimin rrugor, bashkia ka vendosur kufizime për mjetet me peshë mbi 3.5 ton, duke i ndaluar ato të premten nga ora 15:00 deri në 24:00, si dhe gjatë gjithë ditës së shtunë dhe të dielë. Për mjetet e transportit të mallrave (1.5 – 3.5 ton), ngarkim-shkarkimi ndalohet nga e hëna në të premte në oraret 06:00 – 11:00 dhe 15:00 – 24:00, ndërsa për fundjavat ndalimi është në fuqi nga ora 06:00 deri në 24:00.
Gjithashtu, urdhri ndalon parkimin e mjeteve mbi 3.5 ton dhe të kamperave në rrugët kryesore të qytetit, përfshirë Lungomaren dhe Bulevardin “Ismail Qemali”. Sipas njoftimit zyrtar, këto masa janë ndërmarrë për të garantuar sigurinë publike dhe për të ofruar një përvojë më të mirë për vizitorët gjatë muajve të verës.