Këshilli i Ministrave ka miratuar vendimin për pezullimin e përkohshëm të punimeve të ndërtimit dhe aktiviteteve të tjera të lidhura me to në të gjitha zonat turistike të vendit, me qëllim garantimin e zhvillimit të një sezoni turistik të qetë. Vendimi hyn në fuqi pas botimit në "Fletoren zyrtare" dhe do të mbetet në fuqi deri më 15 shtator 2026.
Sipas vendimit, gjatë kësaj periudhe ndalohen:
• Të gjitha punimet në karriera, pikat e nxjerrjes, përpunimit dhe shfrytëzimit të inerteve;
• Punimet e ndërtimit nga faza e gërmimit dhe hedhjes së themeleve deri në përfundimin e ngritjes së karabinasë;
• Çdo aktivitet që shkakton zhurma, pluhur apo ndikime të tjera negative në mjedis.
Nga ky kufizim përjashtohen punimet e rifiniturave të brendshme dhe ndërhyrjet e vogla, të cilat lejohen vetëm nëse janë të pajisura me lejet përkatëse dhe nuk shkaktojnë ndotje akustike apo pluhur. Po ashtu, lejohet ngritja dhe sistemimi i kantiereve, por këto aktivitete duhet të zhvillohen ekskluzivisht brenda fashës orare 08:00–17:00.
Zonat ku zbatohet ky pezullim përfshijnë brezin bregdetar, qendrat historike, zonat e mbrojtura me funksion turistik dhe qendrat urbane turistike. Për territore të tjera me fluks të lartë turistësh, shtrirja e pezullimit do të përcaktohet përmes një urdhri të përbashkët të ministrit përgjegjës për turizmin dhe ministrit të Shtetit për Pushtetin Vendor. Pezullimi mund të shtrihet edhe për aktivitete jashtë këtyre zonave, nëse natyra e tyre ndikon negativisht në zhvillimin e sezonit.
Qeveria ka parashikuar që kjo periudhë pezullimi të llogaritet si afat shtesë mbi afatin e lejes së ndërtimit ose zhvillimit. Për lejet e dhëna përpara hyrjes në fuqi të këtij vendimi, bashkitë, Këshilli Kombëtar i Territorit dhe Ujit, si dhe autoritetet e tjera kompetente janë të detyruara të miratojnë shtyrjen e afatit të përfundimit të punimeve me kërkesë të zhvilluesve. Zbatimi i këtij vendimi do të monitorohet nga Ministria e Turizmit, Kulturës dhe Sportit, njësitë e vetëqeverisjes vendore dhe Inspektorati Kombëtar i Mbrojtjes së Territorit (IKMT).