Këshilli i Ministrave miratoi ndryshime në rregulloren e vitit 2024 për administrimin e stacioneve të plazhit. Vendimi i datës 28 janar 2026 jep kompetenca të reja bashkive për të kontrolluar çmimet e shezlongëve dhe zgjeron zonat në bregdet, liqene dhe lumenj. Këto rregulla zbatohen për sezonin veror të ardhshëm.
Çmime tavan për shezlongë
Për herë të parë, Këshillat Bashkiakë mund të miratojnë çmime maksimale për çdo zonë bregdetare para fillimit të sezonit. Këto çmime shërbejnë si kufi detyrues për subjektet private.
Nëse Këshilli Bashkiak nuk vendos, çmimi maksimal negociohet mes bashkisë dhe privatit gjatë lidhjes së kontratës. Çmimet e dakordësuara bëhen pjesë detyruese e kontratës dhe nuk mund të tejkalohen gjatë sezonit. Tejkalimi përbën shkelje dhe shkak për zgjidhjen e kontratës.
Plazhe publike të tarifuara nga bashkitë
Vendimi krijon kategorinë e re "plazh publik i tarifuar nga NJVV-ja". Këto zona administrohen drejtpërdrejt nga bashkitë ose ndërmarrjet e tyre publike dhe kërkojnë pagesë nga pushuesit, me standarde të garantuara sigurie e higjiene.
Risia kryesore është ndalimi i kontraktimeve apo delegimit te subjektet private, për të shmangur abuzimet me hapësirat publike.
Rregulla për investitorët strategjikë
Investitorët strategjikë gëzojnë përparësi për stacionet e plazhit, por e drejta e përdorimit fillon vetëm pas vënies në funksion të strukturave akomoduese, si hotelet apo resortet. Kjo masë parandalon zaptimin e plazheve nga kantiere të papërfunduara.
Bashkitë detyrohen të publikojnë hartën e zhurmave për secilin plazh.