Qeveria shqiptare miratoi Vendimin e Këshillit të Ministrave, i cili ka hyrë në fuqi pas botimit në Fletoren Zyrtare më 15 mars 2026. Ky vendim zbardh modelin tip të marrëveshjes midis Agjencisë Kombëtare të Bregdetit (AKB) dhe investitorëve strategjikë për përdorimin e brigjeve të detit, liqeneve dhe lumenjve si stacione plazhi.
Dokumenti vendos standarde për menaxhimin e hapësirave publike nga subjektet private, me fokus te siguria e pushuesve, mbrojtja e mjedisit dhe të ardhurat për pushtetin lokal.
Të ardhurat për bashkitë
Kontratat nënshkruhen me AKB-në, por përfitimet financiare shkojnë te njësitë e vetëqeverisjes vendore ku ndodhin investimet. Tarifa vjetore llogaritet sipas tarifave të miratuara nga Këshilli Bashkiak dhe fillon pas vënies në funksion të hotelit apo resortit. Ajo indeksohet çdo vit sipas normës së inflacionit të shpallur nga INSTAT. Investitorët kanë 30 ditë për pagesën mujore në muajin tetor, ndryshe përballen me kamatëvonesa dhe rrezikojnë prishjen e kontratës.
Standarde sigurie
Shtojca 1 e vendimit përcakton kërkesat për kullën e vrojtimit dhe kutinë e ndihmës së shpejtë. Investitorët detyrohen të punësojnë vrojtues të certifikuar gjatë sezonit dhe të pajisin stacionin me mjete shpëtimi profesionale, si barela pluskuese, bovë Baywatch dhe dylbi. Kuti ndihmës mjekësore duhet të ketë nivel mini-reanimacioni, duke përfshirë bombola oksigjeni dhe pajisje të tjera.
Vendimi parashikon gjoba deri në 400 mijë lekë, siç raportojnë disa burime, ose 4 mijë euro, sipas të tjerëve, në rast prishjeje të kontratës për shkelje.