Kryetari i Grupit Parlamentar të Partisë Socialiste, Taulant Balla, në cilësinë e deputetit nismëtar, ka dorëzuar në Kuvendin e Shqipërisë projektligjin për disa ndryshime dhe shtesa në Ligjin Nr. 93/2015 “Për Turizmin”. Nisma ligjore do të shqyrtohet me procedurë të përshpejtuar.
Pezullimi i ndërtimeve dhe masat ndëshkuese
Projektligji i jep kompetencë Këshillit të Ministrave që, përmes një vendimi (VKM), të pezullojë punimet e ndërtimit në zonat turistike gjatë sezonit, për të garantuar zhvillimin e qetë të tij. VKM-ja do të përcaktojë zonat, llojet e punimeve dhe oraret e ndalimit. Për të mbrojtur zhvilluesit, periudha e pezullimit do t’i shtohet automatikisht afatit të lejes së ndërtimit. Çdo shkelje e këtij urdhri do të dënohet me gjobë administrative prej 2,000,000 lekësh.
Standardet për strukturat akomoduese
Një risi është vendosja e detyrimit për marrjen e një certifikate paraprake kategorizimi për çdo subjekt që kërkon të ndërtojë një hotel ose strukturë turistike, si kusht për miratimin e lejes së ndërtimit. Kjo masë synon që objektet të ndërtohen që në fillim sipas standardeve të kërkuara. Gjithashtu, përcaktimi i kategorive, klasifikimeve dhe kritereve për strukturat akomoduese do t’i kalohet kompetencës së Këshillit të Ministrave, duke mundësuar përditësimin e tyre pa ndryshime të shpeshta ligjore.
Aksesi në bregdet dhe regjistrimi i klientëve
Projektligji adreson bllokimin e hapësirave publike, duke ndaluar vendosjen e barrierave fizike si gardhe, trarë apo mure në zonat e stacioneve të plazhit. Gjithashtu, me propozim të ministrit përgjegjës, Këshilli i Ministrave mund të ndryshojë institucionin përgjegjës për administrimin e zonave me përparësi zhvillimin e turizmit për projekte me interes publik. Së fundmi, hotelet dhe strukturat e tjera akomoduese detyrohen të regjistrojnë elektronikisht klientët e tyre.